María Rún Bjarnadóttir, lögfræðingur hjá Ríkislögreglustjóra, segir í samtali við Þetta helst á RÚV að rannsóknartími í máli Gylfa Þórs Sigurðssonar sé ekki óvenjulega langur.
Gylfi var handtekinn í júlí í fyrra, grunaður um kynferðisbrot gegn ólögráða einstaklingi. Hann var svo laus gegn tryggingu, en hún átti að renna út í sumar. Þá hefðu nýjar upplýsingar átt að berast um málið en allt kom fyrir ekki.
„Ef við miðum þetta við rannsóknartíma íslenskra kynferðisbrotamála þá er þetta ekkert hræðilega langur tími, því miður. Það sem er í þessu máli er að við vitum í raun ekkert hverjar ásakanirnar eru. Kannski er mikið af stafrænum gögnum í málinu og það getur gert það að verkum að það hægir á rannsókninni því stafræn gögn eru mjög tímafrek í rannsóknum. Það tekur lengri tíma að fara í gegn um þau,“ segir María við Þetta helst á RÚV.
„Ef maður er meira að fylgjast með þessu þá virðist þetta taka enn lengri tíma. En ég hugsa að margir þolendur í kynferðisbrotamálum út um allan heim kannist alveg við þennan tíma sem rannsókn þessara mála tekur. Því miður.“
Gylfi hefur verið í farbanni frá Bretlandi frá því hann var handtekinn. Faðir hans hefur til að mynda kallað eftir því að íslensk stjórnvöld skipti sér á málinu, en hann vill að lögheimili Gylfa sé flutt til Íslands.
„Farbann er ákveðin þvingunarráðstöfun sem er beitt þegar það er einhvers konar hætta á því að einstaklingur gæti látið sig hverfa eða farið úr lögsögunni á meðan rannsókn málsins fer fram. Þetta er úrræði sem við beitum líka á Íslandi og allsstaðar í hinum vestræna heimi. Það er verið að tryggja það að mögulegur sakborningur stingi hreinlega ekki af. Og það þarf alltaf að fara fram ákveðið mat á því, þegar þú ert með einstakling sem er látinn sæta farbanni.“
Það að ferðabannið hafi ítrekað verið framlengt þýðir að endurmat fari sífellt fram hjá dómstólum á því hvaða gögn séu fyrirliggjandi og hvaða gagna eigi eftir að afla. Þá er einnig lagt mat á það hversu mikilvægt er að hinn grunaði sé í landinu á meðan rannsókn fer fram.
„Það segir okkur að það sé þá einhver gangur í rannsókninni. Vegna þess að ef lögreglan getur ekki sýnt fram á gögn eða framgang í rannsókninni þá auðvitað væri hæpið að dómstólar væru að fallast á að framlengja farbannið ítrekað.“
María bendir á að þó langur tími rannsóknar sé erfiður fyrir sakborninga sé hann það einnig fyrir brotaþola.
„Og það er áhugavert að skoða ákall um hraða málsmeðferð, út frá því að það sé erfitt fyrir sakborning hversu langan tíma þetta tekur, því þetta tekur auðvitað jafn langan tíma fyrir brotaþolann. Og þetta er það sem fólk hefur gagnrýnt mikið við meðferð kynferðisbrota er langur tími og að það sé skaðlegt. Þetta sýnir okkur að þetta getur verið skaðlegt fyrir alla aðila, ekki bara brotaþola.“
Á tíma handtöku var Gylfi leikmaður Everton í ensku úrvalsdeildinni. Hann var settur í leyfi en samningur hans rann svo út í sumar. Gylfi hafði einnig verið fastamaður í íslenska landsliðinu. Hann hefur hins vegar ekkert spilað frá handtökunni.
