Rangers í Skotlandi ætti að horfa til Manchester United í leit að nýjum aðalmarkverði að sögn Paul Robinson.

Robinson er fyrrum markvörður Tottenham og enska landsliðsins en hann telur að Tom Heaton sé góður möguleiki fyrir Rangers.

Heaton er á mála hjá Manchester United en hann fær engin tækifæri þar og er enn aðeins 36 ára gamall.

Heaton var lengi öflugur hjá Burnley í ensku úrvalsdeildinni og gekk svo í raðir Aston Villa og síðar hélt hann til Manchester.

,,Ef þeir geta náð honum frá Manchester United, þá er hann frábær möguleiki,“ sagði Robinson.

,,Tom er einhver sem á mikið eftir óklárað. Hann meiddist hjá Aston Villa og vann sér aldrei inn sæti aftur því Emiliano Martinez kom inn.“

,,Hann hefur aldrei fengið sanngjarnt tækifæri hjá Man Utd. Ég býst við að það hafi verið lofað honum ýmsum hlutum en það varð ekkert úr því.“

,,Tom á meira skilið en að vera markvörður númer þrjú. Hann getur enn gefið svo mikið.“