Unai Emery gat ekki hafnað tækifærinu á að snúa aftur í ensku úrvalsdeildina eftir símtal frá Aston Villa.

Emery segir sjálfur frá þessu en hann var á sínum tíma stjóri Arsenal en hélt síðar til Villarreal í spænsku úrvalsdeildinni.

Þar náði Emery góðum árangri og vann til að mynda Evrópudeildina árið 2021 eftir sigur á Manchester United í úrslitum.

Samningur Emery átti að renna út næsta sumar og var það alltaf vilji hans að klára tímabilið og finna svo nýtt starf.

Emery ætlaði að klára leiktíðina á Spáni en segist ekki hafa getað hafnað tækifærinu á að þjálfa lið Villa sem rak Steven Gerrard eftir slæmt gengi á tímabilinu og er liðið í 15. sæti úrvalsdeildarinnar.

,,Þetta boð, ég þurfti að taka þessari áskorun, þetta er öðruvísi verkefni. Ákvörðunin er bæði persónuleg og atvinnuleg,“ sagði Emery.

,,Allar deildir og öll félög eru mismunandi, eitt er ekki betra en hitt. Þetta er bara öðruvísi. Ég segi skilið við eitt verkefni í Evrópu og nú reyni ég við annað.„