Enska úrvalsdeildin hefur áhuga á því að halda sex liða mót í Bandaríkjunum næsta sumar. Er þetta talið fyrsta skrefið í því að færa einhverja leiki í ensku úrvalsdeildinni vestur um haf. The Athletic fjallar um málið.
Fótboltinn er alltaf að breytast og að verða vinsælli um allan heim. Þetta gera stjórnendur ensku úrvalsdeildarinnar sér vel grein fyrir og vilja nýta til fulls.
Undanfarin ár hefur NFL-deildin í Bandaríkjunum flutt leiki til Lundúna. Þrír leikir í deildinni verða leiknir á Tottenham Hotspur-vellinum á þessari leiktíð.
Það er ekki ólíklegt að enska úrvalsdeildin bregði á sama leik í framtíðinni, spili leik eða leiki í Bandaríkjunum.
Stjórnendur deildarinnar eru þó ekki enn tilbúnir í að færa keppnisleiki til Bandaríkjanna þar sem heimaleikir þykja of dýrmætir til að færa þá til annars lands.
Hins vegar er það nú til skoðunar að halda sex liða mót í Bandaríkjunum næsta sumar á vegum ensku úrvalsdeildarinnar.
Fjórtán félög hafa lýst yfir áhuga á að taka þátt í mótinu, sem yrðu leiknir bæði á Austur- og Vesturströnd Bandaríkjanna.
Sem fyrr segir er þó alls ekki hægt að útiloka að einn daginn verði leikur í ensku úrvalsdeildinni spilaður í Bandaríkjunum.
