Höskuldur Gunnlaugsson, fyrirliði nýkrýndu Íslandsmeistaranna í Breiðablik var gestur í Íþróttavikunnni með Benna Bó þessa vikuna. Þar var meðal annars rætt um þjálfara liðsins Óskar Hrafn Þorvaldsson en hann hefur gjörbreytt umhverfinu og liði Breiðabliks.

Með tilkomu Óskars Hrafns og Halldórs Árnasonar, hefur að mati Höskuldar, komið þannig kúltúr í lið Breiðabliks að það er gerð gífurleg krafa, fyrst og fremst um frammistöðu og svo árangur.

„Á hverri æfingu, æfingaviku og hverjum leik. Ráin er bara komin það hátt að þetta er normið. Þá er standardinn bara orðin þannig hjá okkur off-dagur er samt um 30% betri frammistaða en hún hefði verið á off-degi fyrir nokkrum árum síðan.“

„Svipuð staða og Víkingar hafa gert,“ segir Hörður Snævar Jónsson, íþróttastjóri Torgs. „Þessi félög hafa ýtt hvort öðru hærra.“

Þeirri spurningu var síðan beint til Höskuldar hvernig væri að vera með svona kröfuharðan þjálfara líkt og Óskar Hrafn?

„Stundum, eins og til dæmis á undirbúningstímabilinu, þarf maður alveg að banka í hausinn á sjálfum sér og liðsfélögunum þegar vakna upp spurningar um það af hverju við erum að þessu því þetta verður alveg mjög krefjandi og ógeðslegt á þeim tímapunktum.

Það er samt ákveðin fegurð í því og þú getur ekkert efast um það hvort það sem þjálfararnir leggja fyrir okkur virki. Verðlaunin fyrir það að halda trúnni og leggja sig fram eru, eins og í ár, fyrsta sætið. Þetta er bara spurning um það hvað þú ert tilbúinn til að leggja á þig.“

Nánari umræðu um Breiðablik og Höskuld má sjá í spilaranum hér fyrir neðan: