Virgil van Dijk, leikmaður Liverpool, var aldrei á sama máli og margir knattspyrnuaðdáendur eftir leik liðsins við Manchester City í Samfélagsskildinum í ágúst.

Erling Haaland var þar að spila sinn fyrsta keppnisleik fyrir Man City en stóðst ekki væntingar í fyrstu og var um leið harðlega gagnrýndur af mörgum á samfélagsmiðlum.

Norðmaðurinn hefur svo sannarlega svarað fyrir þessa gagnrýni en hann er með 20 mörk í 13 leikjum fyrir Englandsmeistarana til þessa og virðist óstöðvandi.

Van Dijk viðurkennir að það sé erfitt að spila gegn Haaland en þeir mætast einmitt um helgina í ensku úrvalsdeildinni.

,,Það er svo sannarlega ekki auðvelt [að verjast Haaland] – hann hefur verið sjóðandi heitur og það er ekki hægt að segja neitt annað,“ sagði Van Dijk.

,,Ég man að eftir leikinn í Samfélagsskildinum þá var fólk að dæma hann. Ég man eftir því að hafa hugsað um að þessi maður myndi valda svo mörgum varnarmönnum vandræðum.“

,,Hann hefur sýnt það, hann hefur verið mjög stöðugur og þegar þú spilar fyrir lið eins og City þá færðu þín tækifæri fyrir framan markið.“