Höskuldur Gunnlaugsson, fyrirliði nýkrýndu Íslandsmeistaranna í Breiðablik var gestur í Íþróttavikunnni með Benna Bó þessa vikuna. Þar var meðal annars farið yfir stundina sem Blikar urðu Íslandsmeistarar.

Ljóst var á mánudagskvöldið síðastliðið að Íslandsmeistaratitillinn myndi enda í höndunum á Blikum. Það varð gulltryggt með tapi Víkinga gegn Stjörnunni.

Blikar urðu því svokallaðir sófameistarar en titlinum var og verður vel fagnað næstu vikurnar en þrjár umferðir eru eftir af Bestu deildinni.

„Þetta var bara gott partý á mánudaginn í græna herberginu undir stúkunni okkar,“ sagði Höskuldur í Íþróttavikunni en leikmenn og þjálfarateymi Blika horfðu saman á leik Stjörnunnar og Víkings.

„Það var æðisleg tilfinning að landa þessum titli og er enn,“ segir Höskuldur en hann segir leikmenn þurfa halda sér réttu megin við línuna þar til mótið klárast. Þá sé hægt að fara alla leið í fögnuði.

„Vissulega er kannski ákveðin þjóðhátíð í gangi í Kópavoginum þessa stundina, eðlilega. Stuðningsmenn okkar eru búnir að bíða eftir þessum titli lengi. Við leikmenn reynum kannski að halda okkur réttu megin um línuna svona á meðan að við erum að klára mótið.“

Óskar Hrafn Þorvaldsson, þjálfari Blika sé ekkert að fara leyfa þeim að slaka á.

„Það er ekki í myndinni,“ segir Höskuldur. „Allir leikmenn eru líka til í að klára þetta með sama standard og við höfum verið að setja með spilamennsku okkar í sumar. Það er líka bara skemmtilegra eftir síðasta leik að slútta þessu með alvöru fögnuði.“

Nánari umræðu um Breiðablik og Höskuld má sjá í spilaranum hér fyrir neðan: