Casemiro, leikmaður Manchester United, viðurkennir að hann pirri eiginkonu sína á þeirra heimili þar sem hann er alltaf að horfa á fótbolta þegar tækifærið gefst.

Casemiro gekk í raðir Man Utd frá Real Madrid í sumar en hann hefur lengi verið talinn einn besti varnarsinnaði miðjumaður heims.

Brasilíumaðurinn horfir á eigin leiki allt að fjórum sinnum og vill læra af eigin mistökum sem er mjög heilbrigt hugarfar.

Casemiro horfir ekki aðeins á eigin leiki en hann stillir á fótboltaleik mjög reglulega fyrir framan fjölskylduna.

,,Ég horfi mikið á tölfræðina og nýt þess. Ég held að ég horfi á mína eigin leiki þrisvar eða fjórum sinnum,“ sagði Casemiro.

,,Það er þannig sem þú lærir og þróar þinn leik, með því að leiðrétta mistök. Ég held að það sé það mikilvægasta, að halda áfram að þróa þinn leik.“

,,Ég horfi mikið á fótbolta, ég elska íþróttina. Eiginkona mín verður oft pirruð því það er alltaf fótbolti í sjónvarpinu heima. Þetta er mín ástríða og það er partur af því af hverju ég náði árangri. Ég elska fótbolta og elska að horfa á fótbolta.“