Íslenska U-21 árs landsliðs karla tapaði fyrri leik sínum gegn Tékklandi 1-2 í Víkinni í dag.

Sævar Atli Magnússon kom íslenska liðinu yfir á 25. mínútu með marki af vítapunktinum. Matej Valenta jafnaði fyrir Tékka á 34. mínútu og Vaclav Sejk tryggði þeim sigurinn á 69. mínútu.

Lestu nánar um leikinn hér.

„Ég er svekktur. Við áttum góða kafla og svo ekki eins góða kafla. Í raun er bara mjög gott að þetta er úrslitaeinvígi með tveimur leikjum,“ sagði Davíð Snorri Jónasson, þjálfari Íslands, við 433.is eftir leik.

Það munaði litlu á liðunum í dag. „Þetta eru bara jöfn lið. Þeir fengu móment og kláruðu það. Við fengum eitt í lokin, sem fór rétt fram hjá,“ segir Davíð, en Ísland fékk gott færi í lok leiks, þar sem Sævar Atli Magnússon skaut en varnarmaður Tékka varðist vel. 

„Þetta ræðst oft svona. Seinni leikurinn er eftir. Við ætlum að láta þetta detta okkar megin þar.

Mér fannst við gera vel varnarlega, vísa þeim út og fá pressuna þar. Skiptingarnar voru góðar, hvernig við sækjum vítið var gott. Liðið sýnir hugarfarið sitt í lokin 2-1 undir og við tökum algjörlega yfir þennan leik og erum óheppnir að skora ekki of jafna.“

Ísland stýrði leiknum vel á köflum í dag en það vantaði upp á að opna Tékka oftar.

„Þetta eru þannig leikir að þú færð ekkert endalaust af dauðafærum, en við þurfum að finna lausnir á því og fá fleiri sénsa. Það þarf bara einn til að galopna þetta upp á nýtt,“ sagði Davíð Snorri Jónasson, þjálfari Íslands.