Bruno Fernandes, leikmaður Manchester United, veit að það er oft ekki auðvelt að spila á móti sér á velli.

Fernandes er oft ansi blóðheitur ef illa gengur og mun í raun gera allt til að tryggja þrjú stig fyrir sitt lið.

Hann viðurkennir það sjálfur og myndi ekki hika við að sparka í vin sinn utan vallar ef það myndi hjálpa Man Utd að næla í öll stig leiksins.

,,Svona er ég. Það sem þið sjáið á vellinum er Bruno sem er ástríðufullur fyrir leiknum og gefur ekkert eftir,“ sagði Bruno.

,,Ég mun jafnvel slást við einhvern sem er vinur minn utan vallar. Ég spila gegn Wolves og þar eru margir Portúgalar en ef ég þarf að sparka í þá, þá geri ég það. Ef ég þarf að röfla í þeim, þá geri ég það.“

,,Ég þarf þess, ég hef spilað marga leiki þar sem ég er rólegur en enginn hefur neitt að segja um það. Ég þarf að finna fyrir því að ég sé á lífi.“