Jaap Stam, goðsögn Manchester United, vissi að það yrði talað um hæð Lisandro Martinez um leið og hann skrifaði undir hjá félaginu í sumar.

Martinez hefur byrjað feril sinn nokkuð vel á Old Trafford en hann er ansi smávaxinn miðað við miðvörð sem hefur verið umræðuefni í byrjun tímabils.

Stam hefur þó engar áhyggjur af þessum 24 ára gamla leikmanni sem lék áður með Ajax við góðan orðstír í þrjú ár.

,,Hann er góður leikmaður. Ég vissi um leið og hann kæmi til Englands að fólk myndi tala um hæðina hans,“ sagði Stam.

,,Það getur verið vesen fyrir hafsent að vera ekki með ákveðna hæð en hann hefur sýnt gæði sín bæði í Hollandi og í Meistaradeildinni.“

,,Varnarlega þá er hann mjög aggressívur og stundum þarf hann að átta sig betur á mótherjunum. Þú lærir þetta í ensku úrvalsdeildinni og gegn stóru liðunum þar sem leikmennn eru betri en þeir sem spila í Hollandi.“