Benjamin Mendy, knattspyrnumaður á mála hjá Manchester City, hefur verið úrskurðaður saklaus í einu af nauðgunarmálunum sem höfðuð eru gegn honum.

Var þetta staðfest fyrir rétti í dag.

Mendy er sakaður um átta nauðganir, eitt kynferðisbrot og eina tilraun til nauðgunar. Atvikin eiga að hafa átt sér stað frá október 2018 til ágúst 2021.

Nú hefur eitt málið hins vegar verið dæmt honum í hag.

Var það í máli gegn stúlku, 19 ára þegar atvikið átti sér stað, sem sakar Mendy um að nauðga sér á heimili hans í júlí í fyrra.

Kviðdómur fékk að heyra sögu stúlkunnar á dögunum.

„Ég var orðin nokkuð drukkin. Ég man eftir að hafa verið í lauginni með strákum sem ég hafði ekki hitt áður. Allir voru í lauginni en ég man ekki eftir að hafa yfirgefið sundlaugarherbergið.“

„Það næsta sem ég man er að ég var inni í stofu með Ben (Mendy). Ég var á sófanum og hann var fyrir aftan mig. Hann hélt höndum mínum fyrir aftan bak og var að stunda kynlíf með mér og sagði „ekki hreyfa þig, ekki hreyfa þig.“ Hann sagði þetta þrisvar eða fjórum sinnum.“

„Ég var að reyna að komast í burtu en ég get ekki hreyft hendurnar. Ég var frekar hrædd. Ég fann fyrir honum inni í mér og hendur hans héldu nokkuð þétt um mig.“

Mendy hefur hins vegar verið dæmdur saklaus í þessu máli. Réttarhöld halda áfram.