Manuel Akanji er ekki mættur til Manchester City til að vera varaskeifa og fá góð laun borguð í hverri viku.
Þessi 27 ára gamli varnarmaður segir sjálfur frá þessu en hann kom til Man City í sumar frá Borussia Dortmund fyrir 15 milljónir punda.
Akanji ætlar sér að vinna sér inn byrjunarliðssæti á Etihad og mun sanna eigin gæði fyrr eða síðar.
,,Ég vil sýna það að ég kom ekki hingað til að vera bara einhver leikmaður. Ég vil vera hluti af liðinu og spila eins mikið og hægt er,“ sagði Akanji.
,,Fólk gæti efast um það og ef ég þarf að sanna mig þá geri ég það, þess vegna er ég kominn hingað.“
,,Jafnvel þegar Erling Haaland kom hingað þá var efast um það sama. Auðvitað er hann að sanna annað og ég vil gera það sama. Ég veit að ég er með gæðin til þess en þarf að sýna þau.“
