Marciano Aziz fór á kostum með liði Aftureldingar á seinni hluta tímabils í Lengjudeild karla. Hann er opinn fyrir því að snúa aftur til Íslands á næstu leiktíð.

Belginn skoraði tíu mörk í jafnmörgum leikjum með Aftureldingu á leiktíðinni.

Aziz er í eigu Eupen í Belgíu, þar sem hann á eitt ár eftir af samningi sínum. Hann hefur nú snúið aftur þangað eftir lánssamning hjá Aftureldingu.

Bjarki Már Ólafsson hjá Stirr Associates, umboðsskrifstofu leikmannsins, segir hann mjög opinn fyrir því að snúa aftur til Íslands á næstu leiktíð.

„Við erum að skoða þá möguleika sem eru uppi á borði fyrir janúar. Hann er opinn fyrir því að fara aftur til Íslands og vill spila aftur á Íslandi. Honum leið rosalega vel í Aftureldingu,“ segir Bjarki við 433.is.

Þó svo að Aziz hafi notið sín í botn hjá Aftureldingu vill hann næst taka skrefið upp í efstu deild á Íslandi.

„Hugur hans er að spila í efstu deild á Íslandi. Hann var mjög ánægður með þessa reynslu og þetta var það sem hann þurfti á þessum tímapunkti. Nú telur hann að tími sé kominn til að taka næstu skref á sínum ferli. Ef honum býðst tækifæri til að spila í efstu deild á Íslandi væri það eitthvað sem hann væri mjög opinn fyrir,“ segir Bjarki.