Knattspyrnumaðurinn Emil Pálsson, sem lagði nýverið skóna á hilluna eftir tvö hjartastopp á innan við sex mánuðum, settist í Íþróttavikuna með Benna Bó til að fara yfir fréttir vikunnar ásamt Herði Snævari Jónssyni íþróttastjóra Torgs.

Farið var yfir grátlegt tap íslenska kvennalandsliðsins gegn Hollandi en það munaði aðeins 15 sekúndum að Ísland færi beint á HM sem verður í Ástralíu og Nýja Sjálandi á næsta ári.

Eftir leikinn fór fyrirliði liðsins, Sara Björk Gunnarsdóttir, í viðtal til Gunnars Birgissonar íþróttafréttamanns. Emil var hrifinn af viðtalinu en Hörður var ekki sammála.

„Ég verð að viðurkenna að ég hafði gaman af þessu viðtali. Hún sýndi tilfinningar og þetta var nákvæmlega eins og henni leið á þessum tímapunkti. Maður skilur hana vel. Þær voru að missa af HM og umspilið er meira en að segja það. Maður sá nákvæmlega hvernig henni leið,“ sagði Emil en sagði að kannski hefði hún átt að taka þrjá djúpa andadrætti.

„Hún var verulega hrokafull í þessu viðtali. Spurningar Gunna vinar míns voru ekkert upp á 10,5 en við sem höfum tekið viðtöl eftir leiki getum alveg spurt heimskulegra spurninga.

En þarna er fyrirliði þjóðarinnar að tala til þjóðarinnar í gegnum ríkisútvarpið og hún hefði alveg mátt vanda sig betur. En ég spilaði hæst í þriðju deild, ég veit ekkert hvernig er að tapa svona leik,“ sagði Hörður léttur.