Ragnar Sigurðsson, fyrrum landsliðsmaður Íslands, var gestur í hlaðvarpsþættinum Dr. Football sem fór í loftið fyrir helgi.

Raggi Sig eins og hann er yfirleitt kallaður endaði ferilinn á Íslandi eftir gríðarlega góða dvöl í atvinnumennsku.

Raggi spilaði með liðum á borð við FCK, Krasnodar, Gautaborg, Fulham og Rostov en kom heim til Fylkis 2021.

Þar gekk lítið upp en Raggi lék aðeins fimm leiki er Fylkir féll og var ekki lengi að leggja skóna á hilluna í kjölfarið.

Raggi var ekki lengi að taka ákvörðun um að hætta en hann gat ekki sýnt verkefninu í Árbænum þann metnað sem hann hefði viljað.

,,Menn eru að koma heim og geta svo ekki rassgat og ég var alveg meðvitaður um það. Ég vildi bara fara aftur í minn klúbb og ég ætlaði mér svoleiðis að rífa þetta í gang,“ sagði Raggi.

,,Svo er bara leiðindarveður og þetta er ekki á sama standard, allt bara, allt sem er í kringum fótboltann. Eftir svona viku þá er ég bara, ég er ekkert að fara að rífa þetta upp.“

,,Maður kemur hingað með einhverjar væntingar en svo bara hrynur það, ef þú ert ekki að nenna þessu þá er ekki séns að þú getir staðið þig vel.“