Ragnar Sigurðsson, fyrrum landsliðsmaður Íslands, var gestur í hlaðvarpsþættinum Dr. Football sem fór í loftið fyrir helgi.

Raggi Sig eins og hann er yfirleitt kallaður endaði ferilinn á Íslandi eftir gríðarlega góða dvöl í atvinnumennsku.

Raggi spilaði með liðum á borð við FCK, Krasnodar, Gautaborg, Fulham og Rostov en kom heim til Fylkis 2021 áður en skórnir fóru á hilluna.

Raggi vakti athygli fyrir um átta árum síðan fyrir leik Íslands og Króatíu er hann tjáði sig um heimsfræga framherjann, Mario Mandzukic.

Mandzukic lék á þessu tíma með Bayern Munchen en Raggi greindi frá því á þeim tíma að hann hefði ekki hugmynd um hver leikmaðurinn væri.

Margir töldu að Raggi væri að espa aðeins upp í Króötunum fyrir leik en hann harðneitar fyrir það og segir að hann hafi lítið getað fylgst með deildinni í Þýskalandi á þessum tíma.

,,Þetta voru ekkert stælar. Ég held bara að þeir sem eru mínir nánustu þeir eru þeir einu sem trúa því í dag að ég væri ekkert að grínast, fólk heldur ennþá að ég sé að ljúga og neita fyrir þetta,“ sagði Raggi.

,,Ég er ekkert að fylgjast með þýska boltanum og ég vissi ekkert hver hann var. Maður var ekki með neinar sjónvarpsstöðvar í Rússlandi og það var ekki séns að sjá neina leiki. Þeir voru ekkert eðlilega móðgaðir.“