Ansi áhugavert umræðuefni var rætt í Hlaðvarpsþættinum Þungavigtin á föstudag er nýjasti þátturinn fór í loftið.

Þar ræddi Kristján Óli Sigurðsson fjárhagsmál Fram en hann greindi frá því fyrir ekki löngu síðan að leikmenn liðsins væru ekki að fá borgað á réttum tíma.

Í kjölfarið svöruðu Framarar fyrir þessa ásökun og harðneituðu en Kristján stendur harður á því að þarna sé farið með rétt mál.

Samkvæmt Kristjáni eru Framarar í vandræðum með að borga leikmönnum laun þessa dagana en framlengdu samt sem áður við miðjumanninn öfluga Tiago á fimmtudaginn.

,,Það kom bara póstur á ensku til allra leikmanna frá stjórn að það væri ekki til peningur til að borga alveg strax núna á mánudaginn,“ sagði Kristján.

,,Það er 1. hjá venjulegu fólki og 5. vanalega hjá þeim en það er bara þannig að það er smá brekka og menn sem eru ekki búnir að fá útborgað núna en í gær var framlengt við Tiago, frábæran leikmann og það voru fleiri lið á eftir honum.“

,,Mér skilst að Breiðablik hafi haft áhuga á honum, hvort þeir hafi gert honum formlegt samningstilboð eða ekki þá voru fleiri lið á eftir honum þannig hann hefur fengið alvöru seðil hjá Fram og svo geta þeir gert ekki upp við menn.“

Ríkharð Óskar Guðnason spyr þá Kristján að því hvort þetta sé ekki venjulegt hjá liðum í efstu deild að vera í vandræðum einn mánuð.

,,Ég fékk yfir mig holskeflu og Valtarinn var bara fyrir utan á Jagúar heima hjá mér. Ég stend við þetta og þetta er ekkert eina liðið en ég hef bara ekki fengið gögn annars staðar. Fólk hefur áhuga á að vita svona lagað.“