Aron Jóhannsson, leikmaður Vals, var fyrsti gestur í Íþróttavikunni með Benna Bó sem hóf göngu sína að nýju eftir sumarfrí. Íþróttavikan er á dagskrá á föstudögum á Hringbraut en framundan er stórskemmtilegur íþróttavetur þar sem HM í Katar er hápunkturinn.
Aron spilaði á HM með Bandaríkjunum árið 2014 þegar mótið fór fram í Brasilíu. Hann byrjaði á bekknum í fyrsta leik gegn Gana en kom inná eftir 20 mínútur.
„Ég held að þegar ég horfi til baka núna þá finnst mér þetta miklu meira afrek og vera stærra heldur en þegar ég var að ganga í gegnum þetta. Þá var ég 23 ára og hafði átt gott tímabil með AZ í Hollandi. Það var allt krúsing. Ég var alveg spenntur en samt brjálaður að hafa ekki byrjað inná. Mér leið þannig að ég væri betri en þessir gæjar,“ segir Aron.
„Svo meiðist Jozy Altidore og við erum sendir tveir út að hita og ég horfði á hinn gæjann og hugsaði: Ég ætla rétt að vona að þú sért ekki að fara inná. En ég man eftir að það kom alveg: Shit – þetta er að gerast.“
Aron segir að alltaf sé mikil stemning í kringum HM í Bandaríkjunum. „Þetta var ekkert eðlilegt ferðalag og umtal og fótboltinn í Bandaríkjunum er alltaf að verða stærri og stærri. Það er rétt. En á fjögurra ára fresti þegar Bandaríkin er á HM þá er þetta á öðrum skala. Það er HM horn í öllum borgum og fólk að horfa sem telja hundruð þúsunda. Þetta verður alveg risastórt. Núna þegar maður er eldri og er búinn að átta sig á þessu þá er þetta aðeins stærra en ég gerði mér grein fyrir á þeim tíma.“
Aðbúnaður og annað var allt til fyrirmyndar. „Það hata líka fleiri Bandaríkin en Ísland. Það spilaði stóra rullu inn í þetta. Það voru 20-30 hermenn frá Brasilíu með allar byssurnar og AK47 voru í stærri bílum fyrir framan og aftan. Einn á mótorhjóli og annar fyrir aftan. Svo var sérsveit frá Bandaríkjunum með okkur.“
„Ef við ætluðum að fara af hótelinu til að kaupa okkur eitthvað þá þurftum við að láta vita og skrá okkur og þá kom einn borgaralega klæddur sérsveitamaður með. En þetta er allt stærra og skrýtnara. Þegar við vorum að keppa í Concacaf gegn Panama eða Kosta Ríka þá var á hótel þá sat gæi með svakalega byssu og við þurftum að sýna að við værum í landsliðinu og mættum vera hérna.“
„Ég held að þetta sé ekki svona á Hilton.“
Hörður benti nú á þá krúttlegu staðreynd að þegar blaðamenn væru að klára sína vinnu eftir landsleiki væru leikmenn stundum að labba heim á hótel frá Laugardalsvelli. „Þetta var öðruvísi þegar við kepptum í Bandaríkjunum en það eru mörg ríki sem er ekki vel við Bandaríkjamenn,“ segir Aron Jóhannsson.
