Þorsteinn Halldórsson, landsliðsþjálfari íslenska kvennalandsliðsins, ræddi við 433 í kvöld eftir leik við Hvíta-Rússland í undankeppni HM.

Ísland valtaði yfir Hvíta-Rússland í dag og vann 6-0 sigur og er í toppsætinu í C-riðli fyrir lokaumferðina.

Þar er allt undir gegn Hollandi en sigurinn í dag gerir vonandi mikið fyrir sjálfstraust leikmanna liðsins.

,,Sem þjálfari ertu alltaf að leita að einhverjum smáatriðum og vilt alltaf gera betur en heilt yfir var þetta góður leikur, góður sigur og sannfærandi og bara góð liðsframmistaða heilt yfir,“ sagði Steini.

,,Við gerðum vel í því að láta þeim aldrei líða vel á vellinum eða þannig að þær gætu gert eitthvað á móti okkur. Það var mikil grimmd og mikil vinnusemi, það var alltaf langt hjá þeim í markið.“

,,Við ætluðum að pressa hátt og láta þær vera í vandræðum með að koma boltanum fram á við. Það heppnaðist, við unnum boltann tiltölulega ofarlega á vellinum og það var erfitt fyrir þær að spila á móti okkur.“

Þorsteinn var svo spurður út í Söru Björk Gunnarsdóttur sem gerði tvö mörk í kvöld.

Talað hefur verið um standið á Söru sem er nýbúin að eignast barn en Þorsteinn er gríðarlega ánægður með landsliðsfyrirliðann.

,,Var hún ekki að eignast barn líka? Þú gleymdir því í spurningunni! Sara er atvinnumaður og það er enginn leikmaður sem er eins dugleg. Hún er flott fyrirmynd fyrir leikmenn sem vilja ná langt og ætla sér hluti. Hún er í flottu formi og í góðu standi og ég hef aldrei haft áhyggjur af henni.“

DJI_0436.MP4