Íslenska kvennalandsliðið er einum leik frá því að tryggja sér sæti í lokakeppni HM eftir leik við Hvíta-Rússland í kvöld.

Ísland vann 6-0 sigur á Hvítrússum á Laugardalsvelli og spilar úrslitaleik við Holland í riðlinum á þriðjudaginn um hvort liðið fer beint á HM.

Dagný Brynjarsdóttir ræddi við 433.is eftir leikinn í kvöld um frammistöðuna og verkefnið sem er framundan.

,,Bara góð sko, við vissum að við yrðum sterkari aðilinn í heildina en þurftum samt sem áður að gera þetta vel. Þetta var fagmannleg frammistaða alls staðar á vellinum, héldum hreinu og skoruðum sex mörk og ég held að það sé ekki hægt að biðja um meira,“ sagði Dagný.

,,Ég held að þessi leikur hafi spilast eins og þegar við spiluðum við þær í Serbíu. Við vissum að ef við myndum ná inn marki snemma myndum við ná að brjóta þær niður eftir það og opna þær meira.“

,,Auðvitað er maður í fótbolta fyrir svona stórleiki og við erum virkilega spenntar. Við höfum aðallega verið að einbeita okkur að Hvíta-Rússlandi og ekkert rætt Hollendingana en ég held að allir séu spenntir og vel gíraðir. Okkur langar öllum á HM og við stefnum á sigur á þriðjudaginn og þá vonandi erum við á leið á HM.“

DJI_0437