Framherjinn Martin Braithwaite hefur þurft að upplifa ýmislegt á Spáni en hann leikur með liði Barcelona.

Barcelona hefur í allt sumar reynt að losna við Braithwaite sem á inni laun hjá félaginu og neitar að fara annað fyrr en þau eru borguð.

Stuðningsmenn sem og aðrir tengdir Barcelona hafa í raun lagt Braithwaite í einelti og áreitt hann vegna þess að hann vill fá laun sín borgun.

Barcelona reynir allt hvað félagið getur til að fá inn auka pening þar sem fjárhagsstaða liðsins er virkilega slæm.

Samkvæmt nýjustu fregnum vill Braithwaite fá fjórar milljónir punda eða um 660 milljónir króna frá vinnuveitendum sínum ef hann á að yfirgefa félagið í sumar.

Daninn hefur hingað til neitað að rifta samningi sínum en Barcelona hefur þó engan áhuga á að borga þessa upphæð og er staðan ansi erfið.

Greint er frá því að Börsungar séu tilbúnir að borga Braithwaite tvær milljónir evra en hann tekur það ekki í mál eftir hvernig félagið kom fram við hann sem og aðra leikmenn.

Margir hafa komið Braithwaite til varnar sem vill aðeins fá sín laun borguð en aðrir hafa lagt hann í mikið einelti á netinu og fær hann ekki að æfa með aðalliði félagsins.