Anthony Gordon hefur tjáð félagi sínu, Everton, og stjóra liðsins, Frank Lampard, að hann vilji komast til Chelsea. David Ornstein á The Athletic segir frá þessu.

Gordon hefur verið sterklega orðaður við Chelsea undanfarið. Talið er að Lundúnafélagið sé til í að borga allt að 60 milljónir punda fyrir leikmanninn.

Everton hefur þegar hafnað tilboði Chelsea upp á um 45 milljónir punda í leikmanninn.

Gordon er aðeins 21 árs gamall. Hann var þó fastamaður í liði Everton á síðustu leiktíð og spilaði 35 leiki. Englendingurinn hefur spilað alla þrjá leiki Everton í ensku úrvalsdeildinni það sem af er þessari leiktíð.

Gordon á að baki fjóra leiki fyrir U-21 árs landslið Englands, þar sem hann hefur skorað þrjú mörk.