Sarah Kelly, móðir einhverfs stráks sem lenti í því að Cristiano Ronaldo sló síma úr hönd hans, með þeim afleiðingum að síminn brotnaði og hönd hans var marin, er allt annað en sátt með að kappinn hafi sloppið með aðvörun frá lögreglu vegna atviksins.

Ronaldo var pirraður eftir 1-0 tap gegn Everton. Þegar leikmenn gengu af velli virtist Ronaldo slá einhverju frá sér. Það var síðar staðfest að það var sími hins 14 ára gamla Jacob.

„Hann er svo leiður yfir þessu og hann vill ekki fara aftur á leik. Þetta var fyrsti leikurinn sem hann fer á og þetta gerist. Þetta var frábær dagur alveg fram að þessu. Þetta eyðilagði daginn og skilur okkur eftir með óbragð í munni,“ sagði móðir drengsins á sínum tíma. Áverka mátti sjá á höndum Jacob.

„Það var ráðist á einhverfan dreng af knattspyrnumanni. Þannig sé ég þetta sem móðir.“

Ronaldo baðst síðar afsökunar á atvikinu og sagðist geta boðið Jacob á leik á Old Trafford. Sarah hefur ekki samþykkt það hingað til. Á dögunum hlaut hann aðvörun frá lögreglu.

Móðir drengsins lýsir hins vegar samskiptum sínum við Portúgalann. Hún segir að hann hafi verið virkilega hrokafullur. Sarah lýsir því þegar Ronaldo hringdi í hana. Hann hafi ekki iðrast og haldið því fram að hann hafi „sparkað í eða lamið neinn.“

„Ég var svo reið og hjartað mitt sló svo hratt,“ segir Sarah.

Hún segir einnig að fólk á netinu hafi sent Jacob ljót skilaboð. „Það var ógeðslegt. Strákurinn minn er með hjarta úr gulli. Ég er hrædd við að fara úr húsi, er alltaf að horfa aftur fyrir mig.“

„Mig langar að sjá réttlæti. Það hefur algjörlega vantað.“

Talið er að Ronaldo hafi samþykkt að bæta upp fyrir atvikið í formi peningaupphæðar.