Rebekah Vardy, eiginkona Jamie Vardy sóknarmanns Leicester City í ensku úrvalsdeildinni segist hafa hætt að fara með börn þeirra hjóna á leiki með Leicester City vegna ógeðfelldra söngva sem stuðningsmenn sungu á leikjum liðsins.

Rebekah tapaði á dögunum meiðyrðamáli sínu gegn Coleen Rooney. Fyrir þremur árum síðan taldi Coleen sig hafa komist að því að Rebekah væri að leka upplýsingum um sig og sína í enska götublaðið The Sun. Málið hefur haft mikil áhrif á Vardy-fjölskylduna að sögn Rebekuh.

,,Ég hef fengið lífláts- og nauðgunarhótanir. Ég fór á knattspyrnuleiki og þar voru sungnir ógeðfelldir söngvar um mig,“ segir Rebekah Vardy í samtali við The Sun.

Hún segist í kjölfarið hafa hætt að fara með börn sín og Jamies á knattspyrnuleiki með honum.  ,,Ég var algjörlega niðurbrotin og mér finnst mjög erfitt að ræða um þetta. Sem móðir vil ég bara skýla börnunum okkar frá þessum skít en stundum reynist það bara mjög erfitt.“

Rebekah hefur ávallt neitað sök varðandi að hafa lekið upplýsingum um fjölskyldu Coleen Rooney í fjölmiðla og höfðaði í kjölfarið meiðyrðamál gegn Coleen sem hún að lokum tapaði. Orðspor hennar er nú sagt í molum.