Barcelona á Spáni er ekki hætt að styrkja sig fyrir komandi tímabil og hefur augastað á þremur leikmönnum í ensku úrvalsdeildinni.

Börsungar hafa styrkt sig í sumar og hafa fengið til sín varnarmanninn Jules Kounde frá Sevilla, Robert Lewandowski frá Bayern Munchen, Andreas Christensen frá Chelsea, Franck Kessie frá AC Milan og Raphinha frá Leeds. Christensen og Kessie komu báðir á frjálsri sölu.

Það er ansi athyglisvert í ljósi þess að Börsungar eiga ekki mikinn pening og skuldar leikmönnum sínum laun til margra mánaða.

Catalunya Radio á Spáni fullyrðir það að Barcelona sé ekki hætt á markaðnum og vilji bæta við sig þremur leikmönnum í viðbót og spila þeir allir á Englandi.

Marcos Alonso og Cesar Azpilicueta eru á óskalista félagsins en þeir spila með Chelsea og gætu reynst ódýrir.

Sá dýri er hins vegar Bernardo Silva hjá Manchester City sem myndi kosta Börsunga um 80 milljónir evra ef hann mætir á Nou Camp.

Barcelona hefur eytt um 140 milljónum punda í sumar og virðast hvegi nærri vera hættir.