Javier Tebas, forseti spænsku úrvalsdeildarinnar, vonar það að Cristiano Ronaldo mæti aftur í deildina en hann spilar með Manchester United í dag.

Ronaldo gerði frábæra hluti með Real Madrid á sínum tíma og er í dag orðaður við nágrannana í Atletico Madrid.

Ronaldo vill komast burt frá Man Utd í sumar en hann er 37 ára gamall og vill bæta eigið met í Meistaradeildinni – keppni sem Man Utd spilar ekki í.

Tebas var sár þegar bæði Ronaldo og Lionel Messi yfirgáfu Spán og vonast eftir því að sjá Portúgalann aftur á Spáni.

Tekjur deildarinnar aukast mikið ef svo stór nöfn spila þar í landi og myndi það hjálpa deildinni töluvert ef Ronaldo kemur aftur.

,,Ég væri til í að sjá Cristiano Ronaldo koma aftur í La Liga,“ sagði Tebas í samtali við blaðamenn.

,,Hvort það sé geranlegt fyrir Atletico Madrid veit ég ekki. Þeir þyrftu að losa einhverja leikmenn til að opna fyrir hans komu. Til að fá svona leikmann þá þarftu að búa til svigrúm.“