Leonardo Bonucci, leikmaður Juventus, segir að Matthijs de Ligt þurfi að sýna meiri virðingu eftir að hafa yfirgefið félagið fyrir Bayern Munchen.

Bayern borgar 80 milljónir evra fyrir De Ligt sem fór ekki leynt með það að hann vildi komast annað í sumar.

De Ligt gaf sterklega í skyn í lok síðasta tímabils að hann vildi fara og sagði að það væri ákvörðun sem aðeins hann einn myndi taka.

Bonucci segir að De Ligt hafi ekki sýnt Juventus nógu mikla virðingu og ræddi um það mál við hann í sumarfríinu.

,,Nei það kemur ekki á óvart [að hann hafi farið] því miðað við suma hluti sem hann sagði þá vildi hann ekki vera áfram hjá Juventus,“ sagði Bonucci um brottför De Ligt.

,,Þetta snýst allt um virðingu, þessi hópur sem hann spilaði með í þrjú eða fjögur ár hjálpaði honum að þroskast og það var mikið sett í það verkefni.“

,,Ég óska honum alls hins besta en sumt sem hann sagði þegar hann var með landsliðinu var ekki mjög fallegt. Við töluðum um þetta í sumarfríinu og hann skildi mig.“