Viktor Unnar Illugason var gestur í nýjasta þætti Chess After Dark. Þar ræddi hann meðal annars Gylfa Þór Sigurðsson.

Viktor fór 16 ára gamall til Reading á Englandi, þar sem fyrir var Gylfi Þór Sigurðsson. Hann segist snemma hafa áttað sig á hversu langt Gylfi myndi ná, sem hann svo gerði, líkt og flestir vita.

„Þegar maður var með honum úti áttaði maður sig fljótt á því að hann yrði virkilega góður. Hann lagði svo ógeðslega hart að sér og var svo fókuseraður. Þú vissir alltaf að hann myndi ná mjög langt. Það kom manni aldrei á óvart, það sem hann gerði, því maður vissi hvað hann var búinn að leggja hart að sér,“ segir Viktor.

„Hann var svo vel liðinn. Hann gerði allt rétt sem átti að gera. Ég gerði allt vitlaust í rauninni.“

Þjálfararnir og liðsfélagarnir kunnu vel að meta hvað Gylfi lagði mikið á sig. „Hann var talsvert meiri kóngur þarna en ég. Það kunnu allir við hann og þjálfararnir dýrkuðu hann. Þú getur ekki annað en elskað gæa sem leggur þetta allt á sig.“

Framtíð Gylfa sem knattspyrnumanns er í óvissu en hann hefur í rúmt ár verið undir rannsókn lögreglunnar í Bretlandi vegna gruns um kynferðisbrot gegn ólögráða einstaklingi.