Ísland gerði 1-1 jafntefli við Frakka í lokaleik sínum á Evrópumótinu í kvöld. Um var að ræða síðasta leik í riðlakeppni og er Ísland úr leik.

,,Þetta var náttúrulega spennuþrungið og maður hélt í vonina alveg þangað til flautað var til leiksloka. En svona fór þetta bara,“ segir Sandra Sigurðardóttir, markvörður Íslands, eftir leik.

Sandra stóð sig afar vel á mótinu en hún var að spila sína fyrstu leiki á EM þrátt fyrir að hafa farið á öll fjögur stórmót Íslands hingað til. ,,Ég er ánægð með að vera á þessum stað og ánægð með mína eigin frammistöðu en svekkt með að hafa ekki komist áfram. Er hins vegar stolt af sjálfri mér sem og liðinu öllu.“

Nokkrar breytingar voru gerðar á varnarlínu Íslands fyrir leikinn gegn Frökkum en Sandra telur það ekki hafa komið að sök.

,,Þær stóðu sig vel líkt og mér fannst þær gera í öllu mótinu. Heilt yfir fannst mér við spila varnarleikinn mjög vel í kvöld, við gáfum ekki mörg færi á okkur á móti mjög góðri framlínu franska liðsins,“ segir Sandra.