Cristiano Ronaldo hefur verið mikið í umræðunni undanfarið.
Ronaldo vill komast frá Manchester United. Hann sneri aftur til félagsins í fyrra, tólf árum eftir að hann yfirgaf það fyrir Real Madrid. Sjálfur átti Portúgalinn fínasta tímabil en Man Utd hafnaði hins vegar í sjötta sæti ensku úrvalsdeildarinnar.
Ronaldo hefur til að mynda verið orðaður við Bayern Munchen, Chelsea og Napoli. Chelsea hefur þó útilokað að fá hann til liðs við sig.
CNN í Portúgal sagði í gær frá því að félag í Sádi-Arabíu hafi boðið hinum 37 ára gamla Ronaldo svakalegan tveggja ára samning til að klára glæstan feril sinn. Hann hafnaði því hins vegar miðað við nýjustu fréttir.
Ronaldo fór ekki með Man Utd í æfingaferð til Asíu á dögunum. Sagt er að það sé af fjölskylduástæðum, þó það megi draga það í efa í ljósi sögusagna um framtíð leikmannsins.
Hann heldur sér nú sjálfur í formi og birti hann mynd af sér á æfingu á Instagram í gær. Það vakti athygli að hann er í Man Utd-stuttbuxum á myndinni. Hvort að það sé tilviljun eður ei verður að koma í ljós.
View this post on Instagram
