Knattspyrnumaðurinn Gylfi Þór Sigurðsson mætti á landsleik Íslands og Ítalíu á Evrópumótinu í knattspyrnu í dag á Manchester City Academy leikvanginum. Þetta er í fyrsta skipti í tæpt ár sem Gylfi sést opinberlega eða frá því hann var handtekinn, grunaður um kynferðisbrot gegn ólögráða einstaklingi. Það var vefsíðan fotbolti.net sem greindi fyrst frá.

Gylfi er nú laus gegn tryggingu en framvinda í máli hans mun skýrast á næstu dögum. Gylfi sat með systur sinnu á leiknum en hún er móðir Karólínu Leu Vilhjálmsdóttur, landsliðskonu Íslands.

Gylfi Þór er nú án félags en samningur hans við enska úrvalsdeildarfélagið Everton rann út um síðustu mánaðarmót. Gylfi er 32 ára gamall en hann hefur verið í atvinnumennsku í fótbolta í 17 ár.

Hann lék ekkert með Everton á síðustu leiktíð eftir að lögreglan í Manchester hóf rannsókn vegna gruns um kynferðisbrot gegn ólögráða einstaklingi.

Málið hefur verið til skoðunnar í tæpt ár en búist er við fréttum í miðjan júlí. Skömmu eftir handtökuna var Gylfi látinn laus gegn tryggingu og hefur verið laus síðan þá. Ekki er ljóst hvaða tíðindi koma þann 16 júlí en þrír kosir eru í stöðunni.

Þeir eru að málið verði látið falla niður og Gylfi verði þá frjáls maður, að rannsókn haldi áfram og að Gylfi verði þá áfram laus gegn tryggingu eða að hann geti orðið ákærður.