Chelsea ætlar ekki að bjóða í Cristiano Ronaldo, leikmann Manchester United í sumar. The Athletic segir frá þessu.

Ronaldo er sagður vilja burt frá Manchester United, aðeins ári eftir að hann sneri aftur til félagsins. Hann fór ekki með liðinu í æfingaferð á dögunum.

Man Utd olli vonbrigðum á síðustu leiktíð og hafnaði í sjötta sæti deildarinnar. Sjálfur átti Ronaldo fínasta tímabil. Hann vill leika áfram í Meistaradeild Evrópu.

Chelsea er eitt af þeim félögum sem Ronaldo hefur verið orðaður við en hann mun ekki fara þangað miðað við nýjustu tíðindi.

Chelsea er upptekið á félagaskiptamarkaðnum um þessar mundir. Félagið var að kaupa Raheem Sterling á 47,5 milljónir punda. Þá er Kalidou Koulibaly við það að ganga til liðs við félagið fyrir um 34 milljónir punda. Þá eru miðverðirnir Nathan Ake og Presnel Kimpembe orðaðir við félagið.

Bláliðar munu hins vegar ekki sækjast eftir því að fá Ronaldo einnig.

Ronaldo hefur einnig verið orðaður við félög á borð við Bayern Munchen og Napoli. Í morgun bárust svo fréttir af því að félag í Sádi-Arabíu hefði áhuga á að fá hann og borga honum himinnhá laun.