Milos Milojevic, þjálfari Malmö var að vonum sáttur með að komast áfram í Meistaradeild Evrópu eftir 3-3 jafntefli gegn Víkingi Reykjavík í kvöld en það mátti skynja á sænskum blaðamönnum á fundinum að þeir voru ekki sannfærðir eftir frammistöðu Malmö í einvíginu.

Víkingur Reykjavík og Malmö gerðu í kvöld 3-3 jafntefli á Víkingsvelli í undankeppni Meistaradeildar Evrópu. Úrslitin kvöldsins þýða að Malmö vinnur einvígi liðanna 6-5 samanlagt og eru því komnir áfram í næstu umferð undankeppni Meistaradeildar Evrópu.

,,Hvað er málið með varnarleikinn?“ spurði einn af sænsku blaðamönnunum þar sem Milos sat fyrir svörum á blaðamannafundinum og bætti við að Malmö væri búið að fá á sig mörg mörk undanfarið.

,,Ég tel Víkinga hafa mikil gæði í sóknarleik sínum,“ svaraði Milos. ,,Þeir spila árangursríkan bolta, trúa á sitt upplegg. Þeir voru mjög sterkir á síðasta þriðjungi vallarins í kvöld. Í Malmö áttu þeir tvö skot að marki sem enduðu með tveimur mörkum.

,,Ég hef verið hinum megin við línuna þegar að ég var hjá Hammarby og spilaði á móti fyrirfram sterkari liðum. Tilhneigingin getur verið sú að hægt sé að klára verkefnið með annarri hendi en það er ekki þannig. Ef maður ber ekki 100% virðingu fyrir andstæðingnum mun maður fá það í bakið.“

Finnur þú fyrir pressu í þínu starfi?

Hann var þá spurður út í stöðu Malmö undir hans stjórn. Malmö situr í 5. sæti sænsku úrvalsdeildarinnar og hefur ekki litið sannfærandi út. Þá hefur Milos fengið mikla gagnrýni á sig. Hann fékk eftirfarandi spurningu:

Þið eruð í fimmta sæti í sænsku úrvalsdeildinni og þið vinnið einvígið gegn Víkingi með einu marki þrátt fyrir að vera manni fleiri góðan hluta einvígisins. Finnurðu fyrir pressunni frá stuðningsmönnum félagsins og hvernig horfir þú á stöðu þína hjá félaginu?

,,Finnur þú fyrir pressu í þínu starfi,“ svaraði Milos blaðamanninum sem játaði að finna stundum fyrir pressu. Þá sagði Milos sér líða vel með stöðu sína hjá Malmö.