Glódís Perla Viggósdóttir, leikmaður Íslands, lék með liðinu í kvöld sem spilaði við Belgíu í lokakeppni EM.

Ísland gerði 1-1 jafntefli við Belga í opnunarleiknum sem er smá svekkjandi en liðið hafði möguleika á öllum þremur stigum.

,,Ég held að það hafi verið meira svekkelsi að fá ekki öll þrjú stigin en að sama skapi er þetta eitt stig með okkur áfram í næstu leiki og það er fín byrjun. Við verðum að byggja ofan á þetta,“ sagði Glódís.

,,Mér finnst við betra liðið heilt yfir í leiknum og erum að skapa okkur flottar stöður. Við þurfum að klára þessi færi og komast í 2-0 og þá erum við búnar að loka leiknum, það var það sem vantaði.“

,,Það var fín stemning í hálfleik, við fórum í gírinn að við erum að fara að skora og það breyttist ekkert þó við værum búnar að klúðra víti.“

Berglind Björg Þorvaldsdóttir klúðraði víti í fyrri hálfleik en bætti upp fyrir það í þeim seinni með skallamarki.

,,Hún sagði strax í hálfleik að hún ætlaði að bæta þetta upp og hún gerði það svo sannarlega. Það er gríðarlega svekkjandi að ná ekki að nýta hin færin okkar og klára þennan leik en við erum ánægðar með stigið, þetta er klárlega betra en ekkert.“