Berglind Björg Þorvaldsdóttir lék með liðinu í kvöld sem spilaði við Belgíu í lokakeppni EM og skoraði eina mark liðsins.

Ísland gerði 1-1 jafntefli við Belga í opnunarleiknum sem er smá svekkjandi en liðið hafði möguleika á öllum þremur stigum.

Berglind viðurkennir að það hafi ekki verið áætlunin að gera jafntefli í kvöld og segir að andrúmsloftið eftir leik hafi verið pínu þungt.

,,Andrúmsloftið var pínu þungt. Kannski því þessi leikur endaði bara sem jafntefli en við fengum tækifærin til að vinna leikinn og nýttum þau ekki,“ sagði Berglind.

,,Það er alltaf leiðinlegt að vera tekin af velli en Steini mat þessa stöðu og tók mig útaf og Svava kom vel inná.“

Berglind klúðraði vítaspyrnu í fyrri hálfleik en tókst að bæta upp fyrir það með marki í þeim seinni. Þorsteinn Halldórsson, landsliðsþjálfari, var hvetjandi eftir vítaspyrnuklúðrið.

,,Hann gaf mér bara high five, áfram gakk, svona er boltinn. Það var geggjað moment að geta fagnað með stuðningsmönnunum og já, bara áfram gakk.“

,,Við getum fínpússað sóknarleikinn, við fengum góð tækifæri til að búa til eitthvað og getum klárlega gert betur í hornspyrnum og innköstum. Varnarleikurinn var flottur í dag.“