Samir Nasri hefur útskýrt af hverju hann ákvað að semja við Sevilla árið 2016 og er ástæðan heldur betur undarleg.

Nasri gat þar unnið með Jorge Sampaoli sem var stjóri spænska liðsins en hann var gríðarlegur aðdáandi franska miðjumannsins.

Nasri hefur lagt skóna á hilluna en hann gerði garðinn frægan með Arsenal og Manchester City en gekk í raðir Sevilla á láni árið 2016 og spilaði 23 deildarleiki.

Sampaoli var tilbúinn að gera allt til að fá Nasri í sínar raðir og fékk hann leyfi til að drekka áfengi og kíkja út á lífið svo lengi sem hann myndi spila vel um helgar.

,,Ég átti mjög gott samband við Sampaoli, hann var meira vinur minn en þjálfari,“ sagði Nasri í samtali við Reuters.

,,Sampaoli líkaði svo vel við mig að hann sagði við mig: ‘Komdu í okkar lið, þú getur drukkið áfengi og farið út á lífið, gerðu það sem þú vilt og ég sé um þig. Það eina sem ég bið um er að þú spilir vel um helgar.’

,,Eina helgi þá gat ég ekki spilað og vildi fara heim til að hitta fjölskylduna og hann bauðst til að sjá um húsið mitt og hundinn minn.“