Adel Taarabt, leikmaður Benfica og fyrrum leikmaður í ensku úrvalsdeildinni, hefur tjáð sig um fyrrum samherja sinn Darwin Nunez sem er kominn til Liverpool.
Nunez átti magnað tímabil með Benfica á síðustu leiktíð og hefur nú gert samning við Liverpool.
Taarabt er gríðarlega hrifinn af þessum 22 ára gamla leikmanni sem kostar Liverpool um 100 milljónir evra.
,,Ég fýla framherja sem eru sjálfselskir, þeir vilja bara skora mörk. Mér líkar við sóknarmenn sem klára færin,“ sagði Taarabt.
,,Nunez er með þetta. Ef hann skorar ekki þá er hann ekki ánægður en mun alltaf leggja sig hart fram fyrir liðið. Hann er í frábæru formi, ef þið sjáið líkamann á honum þá er um alvöru íþróttamann að ræða.“
,,Hann er vélmenni og hann mun klárlega raða inn mörkunum í úrvalsdeildinni.“
Taarabt var sjálfur mikil vonarstjarna á Englandi á sínum tíma með Queens Park Rangers en samdi við Benfica árið 2015.
