Henry Birgir Gunnarsson, íþróttafréttamaður Vísis telur Arnar Þór Viðarsson, landsliðsþjálfara íslenska karlalandsliðsins í knattspyrnu ekki hæfann til þess að leiða uppbyggingu íslenska landsliðsins. Henry ræddi stöðuna í Reykjavík Síðdegis fyrr í dag.

Hann segir 1-0 sigur liðsins gegn San Marínó, liðinu í neðsta sæti heimslista FIFA hafa kynnt undir gagnrýnisröddum og skilað fleiri neikvæðum punktum fremur en jákvæðum.

Hann segist skilja að um erfitt verkefni sé að ræða að halda utan um taumana hjá íslenska liðinu. Kynslóðaskiptin í liðinu hafi komið hratt og mun hraðar en margir bjuggust við.

,,Það eru hér og þar ákveðin bataskref hjá liðinu en gengur illa á öðrum sviðum og stemmningin í kringum liðið lítil.“

Aðspurður að því hvort sætið væri orðið heitt undir Arnari Þór, hafði Henry Birgir þetta að segja:

,,Ég myndi segja það. Þetta veltur á stóru leiti á frammistöðu kvöldsins,“ sagði Henry Birgir og þegar þetta er skrifað er staðan 1-1 á Laugardalsvelli og kominn hálfleikur. ,,Segjum að liðið eigi glansleik og komist vel frá þessu er Arnar að búa sér til ákveðið svigrúm.“

,,Verði leikurinn ekki gott framhald af því sem verið hefur munu óánægjuraddir með hans stöðu magnast og margir munu kalla eftir því að hann fari.“

Henry segir Arnar vera frambærilegan mann að mörgu leyti en að það megi spyrja sig hvort A-landsliðið sé uppeldisstöð fyrir þjálfara.

,,Ég segi nei. Við höfum prófað það áður með miður góðum árangri.“

Hann segir Ísland búa yfir rosalega efnilegum hóp af leikmönnum, hóp sem þurfi alvöru þjálfara. ,,Það þarf reynslumeiri þjálfara og miðað við það sem ég hef séð hingað til þá er ég á því að Arnar sé engan veginn nægilega hæfur til að leiða þessa vinnu til framtíðar.“