Arnór Sigurðsson var einn af ljósu punktunum í leik íslenska landsliðsins í knattspyrnu gegn Ísrael í kvöld. Hann var að vonum svekktur með 2-2 jafntefli úr því sem komið var og segir liðið þurfa að læra klára svona leiki.

Mjög svekkjandi úr því sem komið var. Við eigum að klára svona leiki og hvað þá á heimavelli. Það kemur upp svipuð tilfinning í þessum leik og í leiknum gegn Albaníu þar sem mér fannst við eiga að klára leikinn. Við eigum ekki að fá á okkur svona soft mörk.

Arnór hefur fengið mikið traust í landsliðsverkefninu og hefur stigið upp.

Það er geggjað að vera farinn að spila almennilega fótbolta og fá þessa leiki. Ég verð alltaf stoltur þegar að ég fæ tækifærið á að spila fyrir Ísland og ég get tekið helling af jákvæðum punktum fyrir mig persónulega úr þessum glugga.

Það er líka helling af hlutum sem við þurfum að laga og þá kannski helst að klára svona leiki. Ef við horfum til gullkynslóðarinnar þá eru þetta leikir sem þeir kláruðu. Við þurfum að horfa á það hvernig við sem lið getum klárað þessa leiki.

Arnór var á láni hjá ítalska liðinu Venezia á nýafstöðnu tímabili og tækifærin þar voru af skornum skammti. Hann snýr nú aftur til CSKA Moskvu og hafði þetta að segja um framtíð sína:

Hún verður bara að koma í ljós. Ég á náttúrulega tvö ár eftir af samningi mínum í Rússlandi. Nú tekur við frí og svo tek ég stöðuna, sé hvað gerist.