„Það þarf ekki að horfa lengi á fallegu trén til að skilja hvað heillaði hann við þetta hverfi,“ skrifar Daniel Taylor í ítarlegri grein um Gylfa Þór Sigurðsson á The Athletic í dag.
„Göturnar eru breiðar og húsin glæsileg. Aðeins þeir vel efnuðu geta leyft sér að leigja hús hérna. Stórir veggir, hlið og öryggismyndavélar, sport bílar og fleira til að staðfesta að hér búa knattspyrnumenn.“
Taylor fer í nokkuð löngu máli yfir mál Gylfa Þórs sem handtekinn var fyrir tæpu ári grunaður um kynferðisbrot gegn ólögráða einstaklingi. „Það var hér síðasta sumar sem lögreglumenn bönkuðu upp til að rannsaka kynferðisbrot,“ skrifar Taylor sem virðist hafa farið að gamla heimili Gylfa Þórs.
Taylor segir að Gylfi búi ekki þar lengur heldur hafi flutt sig í annað húsnæði eftir handtökuna. Gylfi er ekki nafngreindur í greininni en bresk lög banna það.
„Hann er ekki með þegar liðsfélagarnir fara í golf eða þegar þeir stoppa og fá sér kaffi eftir æfingar. Hann býr á stað sem enginn veit hvar er á meðan lögreglan rannsakar málið.“
Taylor segir að fartölva Gylfa hafi verið tekin af honum við handtöku. Hann segir einnig að teipað hafi verið fyrir þakglugga á nýja húsnæði Gylfa til að koma í veg fyrir að drónar gætu tekið myndir af honum og fjölskyldu hans.
„Enginn hjá félaginu vill ræða þetta og fyrir utan það hefur enginn nákvæm smáatriði,“ segir Taylor en segir að Everton hafi hjálpað Gylfa eftir að málið kom upp.
Mál Gylfa hefur lengi verið í rannsókn og fimm sinnum hefur hann verið dæmdur til að vera laus gegn tryggingu. Næstu fréttir í málinu koma 16 júlí.
„Leikmenn Everton voru kallaðir á fund síðasta sumar til að láta vita af málinu. Nákvæm atriði komu ekki fram, mörgum var brugðið þegar þeir heyrðu af þessu,“ skrifar Taylor.
Hann segir að aðstoðarmaður leikmanna hjá Everton afi hjálpað Gylfa að finna nýtt húsnæði, félagið vissi að hann gat ekki lengur búið á sama stað og ekki var í boði að flytja á hótel.
Taylor segir að Gylfi fái enn laun sín frá Everton enda sé ekki búið að ákæra eða dæma í málinu. Hann segir útilokað að Everton bjóði honum þó nýjan samning þegar samningur hans rennur út í lok júní.
