Ísland gerði í kvöld 2-2 jafntefli gegn Ísrael á útivelli í fyrstu umferð B-deildar Þjóðadeildar UEFA. Ísland var yfir lengi vel í leiknum en mark undir lok leiks frá Ísrael sá til þess að liðin skiptu með sér stigunum.

Ísraelar náðu forystunni á 25. mínútu og varnarleikur Íslands í aðdragandanum ekki upp á marga fiska. Ísraelsmenn komust alltof auðveldlega upp vinstri kantinn  þar sem Manor Solomon átti að lokum fyrirgjöf sem Liel Abada átti ekki í vandræðum með að koma í markið.

Íslenska liðið hressist eftir að hafa fengið markið á sig.

Arnór Sigurðsson komst í stöðuna einn á móti markmanni nánast í næstu sókn eftir að Ísraelar höfðu skorað eftir frábæra stungusendingu frá Hákoni Arnari. Markmaðurinn fór í Arnór eftir að hann hafði skotið að marki en dómari leiksins sá ekkert athugavert við atvikið og dæmdi því ekki vítaspyrnu.

Áhlaupið hélt áfram hjá íslenska liðinu því að á 34. mínútu fékk Jón Dagur Þorsteinsson flott færi og átti frábært skot að marki en Ofir Marciano, markvörður Ísraela var vandanum vaxinn.

Pressa Íslendinga hélt áfram og einhvað hlaut að láta undan. Á 42. mínútu barst boltinn til Jóns Dags úti á vinstri kantinum. Hann átti hættulega sendingu inn á teig sem markvörðir Ísraela varði út í teig. Bolti lenti fyrir Þóri Jóhann Helgason sem kom honum af miklu öryggi í markið, hans fyrsta mark fyrir A-landsliðið.

Staðan var því 1-1 þegar að dómari leiksins flautaði til hálfleiks.

Ísraelar byrjuðu seinni hálfleikinn betur en Arnór Sigurðsson kom Íslandi yfir á 53. mínútu eftir frábæran undirbúning frá Herði Björgvini og Íslendingarnir bitu frá sér eftir það.

Liðin skiptust á að sækja eftir mark Íslands en íslenska liðið hafði þó góð tök á leiknum og hefði getað bætt við fleiri mörkum.

Það voru hins vegar Ísraelar sem náðu að jafna leikinn á 83. mínútu. Það gerði Shon Weissman með skalla eftir fyrirgjöf frá D.Leidner utan af vinstri kanti og aftur má setja stórt spurningarmerki við varnarleik íslenska liðsins í aðdragandanum.

Fleiri mörk voru ekki skoruð í leiknum. Svekkjandi jafntefli niðurstaðan miðað við hvernig leikurinn var að spilast en eitt stig niðurstaðan úr fyrsta leik.