Króatíski vængmaðurinn Ivan Perisic hefur samið um að ganga til liðs við enska knattspyrnufélagið Tottenham Hotspur á næstu leiktíð þegar samningur hans við Inter Milan rennur út í næsta mánuði. Þetta segja fjölmiðlar á Englandi.
Perisic mun skrifa undir tveggja ára samning við Tottenham þar sem hann hittir fyrir sinn gamla stjóra, Antonio Conte. Conte er sagður hafa haft samband við Króatann og sannfært hann um að ganga til liðs við Norður-Lundúnarfélagið.
Perisic hefur verið leikmaður Inter frá árinu 2015. Hann var á láni hjá Bayern Munchen tímabilið 2019-2020 og var hluti af liðinu sem vann þrefalt. Hann skoraði einnig í undanúrslitaleiknum gegn Englandi á HM 2018, sem og í úrslitunum gegn Frökkum í 4-2 tapi.
Markvörðurinn Fraser Forster hefur einnig samið við Tottenham en hann kemur frá Southampton á frjálsri sölu.
