Átta leikir voru spilaðir í 32-liða úrslitum Mjólkurbikars karla í kvöld. Þar stóð upp úr viðureign Sindra og ÍA sem lauk með 5-3 sigri Skagamanna.
Leikurinn fór fram í Höfn í Hornafirði. Sindri komst tvisvar í forystu með mörkum frá Abdul Bangura og Ibrahim Sorie Barrie en staðan varð aftur jöfn, 2-2, á 67. mínútu þegar Gunnar Orri Aðalsteinsson, leikmaður Sindra, setti boltann í eigið net.
Kaj Leo Í Bartalstovu kom Skagamönnum yfir fimm mínútum síðar og Guðmundur Tyrfingsson bætti við fjórða marki gestanna á 79. mínútu. Ivan Eres tókst að klára í bakkann fyrir Sindra tveimur mínútum síðar áður en Gísli Laxdal Unnnarsson tryggði ÍA 5-3 sigur á lokamínútum leiksins.
Viðureign Selfoss og Magna fór alla leið í vítaspyrnukeppni eftir 1-1 jafntefli í venjulegum leiktíma og framlengingu. Selfoss vann að lokum vítaspyrnukeppnina 5-3.
Ægir varð fyrsta liðið til að tryggja sig áfram í kvöld með 3-1 útsigri á Höttur/Huginn. Afturelding vann 3-2 útsigur á Vestri í framlengingu ÍR vann sömuleiðis útsigur á Grindavík.
HK vann 3-1 sigur á Gróttu í Kópavogi á meðan Kórdrengir unnu 2-0 sigur á Hvíta riddaranum. Dalvík/Reynir vann þá 2-0 sigur á Þór í lokaleiknum í kvöld.