Það er pirringur í Jesse Lingard og hans fjölskyldu vegna stöðu hans hjá Manchester United og þá vegna þess að hann hafi ekki fengið að kveðja stuðningsmenn félagsins á mánudag.
Samningur Lingard er á enda í sumar og var þetta síðasti leikurinn þar sem hann er í hóp á Old Trafford. Lingard fékk ekki að taka þátt í leiknum.
Á sama tíma fengu Juan Mata, Edinson Cavani og Nemanja Matic að kveðja stuðningsmenn félagsins en báðir fara frá félaginu í sumar.
— Jesse Lingard (@JesseLingard) May 3, 2022
Lingard sendi frá sér færslu á samfélagsmiðlum í gær þar sem hann birtir mynd af sér sem ungur leikmaður hjá United.
Bróðir hans Louie Scott lét félagið heyra það í gær. „Tuttugu ár af blóði, svita og tárum. Fjórir titlar, þrír bikarúrslitaleikir. Fær ekki einu sinni að kveðja, ekki skrýtið að félagið sé á leið í Sambandsdeildina,“ skrifar Scott ansi reiður.
Hann hjólar svo fast í Glazer fjölskylduna sem á félagið. „Það er ráðist á leikmenn fyrir fögn þeirra þegar félagið ætlaði sér í Ofurdeildina. Félagið er rekið af fólki sem þekkir ekki einu sinni rangstöðuna. Vantar allan klassa og stuðningsmenn verða að fatta það.“
„Lingard hefur verið hérna frá níu ára aldri og fékk ekki að kveðja. Vel gert bróðir, við erum stolt af þér.“
