Rætt var um áhorfendur á fótboltaleikjum á Íslandi í íþróttavikunni með Benna Bó sem er á dagskrá Hringbrautar alla föstudaga klukkan 21. Fótboltatímaritið 4-4-2 setti á sinn óskalista fyrir fótboltafíkla að kíkja á leik á Íslandi. Pálmi Rafna Pálmason, fyrirliði KR, sat í settinu með Herði Snævari Jónssyni, íþróttastjóra Torgs en þeir félagar voru sammála um að þarna lægju sóknarfæri.

„Ég veit að það er áhugi hjá fólki að koma og skoða vellina og svo framvegis. Það koma póstar til okkar í KR frá fólki sem vill koma og kíkja á KR svæðið,“ sagði Pálmi. „Vandamálið er kannski ekki að fólk vilji ekki koma á völlinn heldur að við séum ekki nógu flink í því að fá fólk á völlinn. Það er alltaf einn og einn sem hefur samband.“

Hörður benti á að hann hefði farið til Póllands ekki alls fyrir löngu og viljað fara á leik þar í landi. Þáttastjórnandinn var í Eistlandi og fór á leik þar í landi. „Það eru til fótboltafíklar sem ferðast til Íslands. Ég hef stundum séð í Vestmannaeyjum að þar séu ferðamenn. Við getum klárlega gert betur í þessum efnum.“

Hörður benti á að fólk væri að komast aftur á lagið með að fara á völlinn og segir að Besta deildin hafi farið vel af stað. „Það er ekkert vesen. Skemmtilegasti leikur sem ég hef farið á hér á Íslandi var Breiðablik Valur í fyrra sem var einmitt líka á laugardagskvöldi. Ég á von á álíka skemmtun á laugardaginn þegar KR kemur á Hlíðarenda. Laugardagsleikur að kvöldi. Það er meiri gleði.“