Hilmar Árni Halldórsson stjörnuleikmaður Stjörnunnar fór í aðgerð fyrir helgi þar sem það fékkst staðfest að krossband hans væri slitið.

Hilmar Árni sleit krossbandið í Boganum á Akureyri þar sem Stjarnan lék í Lengjubikarnum. Forráðamenn Stjörnunnar hafa gagnrýnt það mjög að leikurinn hafi farið fram þar. Grasið í Boganum er sagt stórhættulegt.

„Það er rétt, hann fór í aðgerð í síðustu viku. Þá er krossbandið slitið og hann fór í aðgerð, hann verður frá í níu eða tíu mánuði,“ sagði Ágúst Gylfason þjálfari Stjörnunnar við 433.is.

Ljóst er að áfallið er gríðarlegt fyrir Stjörnuna en Hilmar hefur verið einn allra besti leikmaður deildarinnar síðustu ár. Eftir erfitt síðasta tímabil virtist Hilmar vera að finna sitt besta form nú þegar rétt um 40 dagar eru í BEstu deildina.

„Þetta er gríðarlegt áfall. Verst fyrir Hilmar sjálfan auðvitað, hann var búinn að vera á eldi með okkur í vetur. Við reynum að fá hann inn í teymið á einhvern hátt,“ segir Ágúst en ljóst er að Hilmar tekur ekkert þátt í Bestu deildinni á þessu ári og spilar ekki fótbolta fyrr en á næsta ári.