Ásgeir Galdur Guðmundsson hefur skrifað undir hjá FC Kaupmannahöfn. Þessi 15 ára Bliki hafði verið eftirsóttur. Danska félagið staðfesti söluna í vikunni.

Allt bendir til þess að Ásgeir Galdur sé næst dýrasti leikmaður sem seldur hefur verið frá Íslandi. Þannig herma heimildir 433.is að kaupverðið sé á milli 40-50 milljóna króna. Kristian Nökkvi Hlynsson sem Breiðablik seldi til Ajax fyrir tveimur árum er dýrasti leikmaður sem farið hefur frá Íslandi.

Ásgeir Galdur ólst upp hjá ÍBV en hann gekk í raðir Breiðabliks fyrir rúmum tveimur árum. Uppeldisbætur byrja að telja frá 12 ára aldri en Ásgeir yfirgaf ÍBV þegar hann var þrettán ára.

Ásgeir verður 16 ára í apríl en á vef FCK kemur fram að hann gangi þá formlega í raðir félagsins í sumar.

FCK sem er stærsta félag Danmerkur horfir mikið til Íslands en fyrir hjá félaginu eru Andri Fannar Baldursson, Hákon Arnar Haraldsson, Ísak Bergmann Jóhannesson og Orri Steinn Óskarsson.

„Ásgeir Galdur er einn af þeim bestu á sínum aldri á Norðurlöndunum,“ segier Mikkel Köhler yfirmaður unglingastarfs FCK.

Breiðablik hefur undanfarin ár verið með mjög öflugt unglingastarf og hefur það skilað sér í því að félagið hefur selt út marga unga leikmenn.