Svo virðist sem sem talsverður flótti sé úr Knattspyrnusambandi Íslands en lykilfólk í stjórn sambandsins og einn reyndasti starfsmaður eru öll á útleið.
Fram kom í útvarpsþættinum Fótbolta.net á laugardag að Þorvaldur Ingimundarson hefði sagt upp störfum. Þorvaldur er heilindafulltrúi KSí.
Einn aðili sem 433.is ræddi við í dag sagði það mikla blóðtöku fyrir sambandið að missa Þorvald, hann hefði mikla reynslu af öllum sviðum fótboltans og væri alltaf boðinn og búinn til að aðstoða við öll þau mál sem kæmu upp hjá félögunum í landinu.
Kosið verður til stjórnar KSÍ á næstu ársþingi sambandsins sem fram fer í lok febrúar. Núverandi stjórn er aðeins til bráðabirgðar og því verður kosið í öll sæti á þinginu. Í venjulegu árferði er aðeins kosið um fjóra nýja aðila í stjórn.
Mikið af reyndu fólki fór úr stjórn KSÍ í október þegar öll stjórnin hafði sagt af sér. Nokkuð af fólki með reynslu gaf þó kost á sér áfram og hefur setið síðustu mánuði.
Valgeir Sigurðsson sem setið hefur í stjórn KSÍ síðustu ár hefur þannig tekið ákvörðun um að gefa ekki kost á sér áfram. „Ég ætla ekki að gefa kost á mér í þessari lotu,“ segir Valgeir í samtali við 433.is en hann gegnir einnig formannsembætti mótanefndar.
Þá staðfesti Þóroddur Hjaltalín sem einnig á sæti í aðalstjórn KSÍ að hann myndi ekki gefa kost á sér áfram í stjórn. Hann útilokaði þó ekki að starfa áfram innan hreyfingarinnar, þar sem hann er einnig formaður dómaranefndar.
Borghildur Sigurðardóttir varaformaður KSÍ skoðar einnig stöðuna og hvort hún gefi áfram kost á sér. „Ég er ekki búinn að taka ákvörðun, er ennþá að velta málinu fyrir mér,“ sagði Borghildur í samtali við 433.is.
Þá hefur 433.is heimild fyrir því að Ingi Sigurðsson ætli ekki að gefa kost á sér en þessi fyrrum knattspyrnumaður úr Vestmannaeyjum hefur verið í stjórn síðustu ár. Þá eru allar líkur á því að Orri Hlöðversson láti af störfum en hann er á leið í framboð fyrir Framókn í Kópavogi.
Ljóst er að það er mikið áfall fyrir Knattspyrnusambandið að missa allt þetta lykilfólk úr stjórn, allir aðilar hafa mikla reynslu og eftir situr fólk með litla sem enga reynslu af stjórnarstörfum KSÍ.
Vanda Sigurgeirsdóttir er formaður KSÍ í dag og stefnir á endurkjör nú í febrúar en allt stefnir í að barist verði hart um stól formannsins. Þannig er Sævar Pétursson framkvæmdarstjóri KA að íhuga framboð.
Samkvæmt heimildum hefur Sævar síðustu daga kannað hug félaganna í landinu og fór helgin hans í það. Búist er við því að Sævar greini frá ákvörðun sinni á næstu dögum.
Þá er Páll Magnússon fyrrum þingmaður Sjálfstæðisflokksins að skoða stöðuna en hann hefur fengið áskorun um það að gefa kost á sér í formanninn.
