Mason Greenwood, sóknarmaðurinn efnilegi hjá Manchester United, hefur verið sakaður um hrottalegt ofbeldi á samfélagsmiðlum. Ung kona að nafni Harriet Robson, sem var kærasta Greenwood, birti færslu á Instagram-síðu sinni þar sem sjá hana með sprungna vör og aðra áverka sem hún sakar Greenwood um að hafa veitt sér. „Til allra þeirra sem vilja sjá hvað Mason Greenwood gerir mér,“ skrifar Robson. Að auki birtir hún ógeðfellda hljóðupptöku þar sem heyra má aðila, sem hún heldur fram að sé Greenwood, hóta henni ofbeldi ef hún stundar ekki kynlíf með honum.

Robson eyddi færslunni fljótlega eftir að hún birtist en hún var skömmu síðar komin í mikla dreifingu á samfélagsmiðlum.

Manchester United brást hratt við og gaf út yfirlýsingu þar sem fram kom að klúbburinn væri meðvitaður um myndirnar og þær ásakanir sem væru í dreifingu á samfélagsmiðlum. Ekki verði brugðist frekar við þeim fyrr en málið hafi verið skoðað nánar. Þá var tekið fram að klúbburinn fordæmi hverskonar ofbeldi. Þá hefur lögreglan í Manchester einnig gefið út yfirlýsingu þess efnis að áskanirnar séu komnar inn á þeirra borð.

Greenwood er talinn einn efnilegasti leikmaður Englendinga en hann hefur verið duglegur við að koma sér í vandræði utan vallar. Hinar nýju ofbeldisásakanir gætu sett feril leikmannsins í uppnám reynist þær sannar.

Sjá einnig: Eftir einnar nætur gaman í Reykjavík er Greenwood nú í klípu hjá United